صفحه لشاعر علي الغدير الهزيمي

علي الغدير

يامطر يابن طرقي والتجارب دليل
والخلايق تبين بين ليل ونهار

كان تبغى تحط وكان تبغى تشيل
اختر اللي تشوفه وانت راع الخيار

مطرالطرقي

يا علي يا لغدير كل قولك جميل
ضاري ن للمساري مع طوال العمار

نتركي للحمول الجايره ي الزميل
و نستند باليدين الطايله ذا قرار

علي الغدير

والنعم في عميل ٍ مايخون العميل
واقف ٍ في يمينه والهقاوي كبار

من زرع شي يجني يالبناخي حصيل
والرجال العزيزه يحصدون الثمار

مطر الطرقي

الا صاله تبين من هروج الاصيل
كل ما قلت قال العلم قدام صار

المجاني عريبه كيف نرضى تحيل
الجزايل كما خيل ن تسلسل مهار

علي الغدير

شفت بعض الخلايق للبوارق تخيل
وانت تدري مطرها عقربي للخضار

ماسمعنا ب وادي من مطرها يسيل
ولا جهلنا السوالف سرها والجهار

مطر

السرايا تضم افرادها والفصيل
الطوابير مربوطه ب اعاز استدار

الجمل يرتكي ولا الضخامه ل فيل
والمعاني تقند من صحيبك بهار

علي الغدير

من مشى للمعالي بان دربه طويل
غير بعض الهقاوي والخطاوي قصار

الهدف لليماني واليماني سهيل
وانت دربك يجمل ماجهلت المسار

مطر الطرقي

ما نسيب المعاني لجل هذا القبيل
وكل صاحب فخامه لازمه مستشار

صح الله لسانك

صح الله لسانك وبدنك .. تشرفت باللعب معاك والقادم افضل بإذن الله

أَلِسًلَأًمً عُلَيٌڳٌمَ وَرَحُمُة أٌلِلُهِ ۇۈۉبّرِڳًأٌتُهّ
صباح الخير .. مساء الخير
اشكر الاخ الشاعر : مطر الطرقي للاضافه وفتح صفحه خاصه ب اسمي

هناا سوف اضع المحاورات - الرديات - القصايد
واتمنى ان تنال على القبول والاعجاب

ابداً ب قصيده ك مصافحه اولى تصدر ب اسمي في صفحتي الشخصيه

انا يارفيقي يوم ابسلى مع الجلاس
يجيني من الهوجاس شي ٍ يسريني

اجي رايق ٍ بالي واروح وانا محتاس
مع ٓ العبره اللي حالفه ماتخليني

عليك الله اكبر يوم اجامل وانا حساس
اخاف الملام وكلمة الناس تاتيني

اكابر واداري هاجس ٍ للفكر عساس
يهز الخفوق وطاوي الضيق يطويني

وانا ماذبحني غير غرو ٍ سمع له ناس
وقفّى بعد ماكان دينه على ديني

تمكن غلاه وعوج الاضلاع له حراس
وحبه معاَ دمي سرى بالشرايني

هجرني بعد ماحط له بالحشا مجلاس
ولا عاد لي حيلة سوى فركة ايديني

غرام ٍ مضى وقته من اسباب كلمة راس
سمعها وصدقها ولا عاد شاريني

اقول الغلا ماطاح واقول ماله ساس
واسوق الظنون وقلبي يقول يغليني

طواري غرامه في خيالي تدق اجراس
تعيد الخفوق ل ذكرياته وتشقيني

صحيح الغلا باقي واذا ذعذع النسناس
اقول الله اكبر وين داره وانا ويني

رضيت الفراق وقسوة البعد ضربة فاس
لو ان المفارق معه ماكان يرضيني

اهوّن على حالي ولو قلت لك لاباس
ترى الجرح في قلبي وياثر على عيني

محبكم : علي عوده الغدير

صح الله لسانك وانت الفخر

تحياتي ل شخصك الكريم

علي الغدير

ياسلام الله سلام اسلام قبل ابدا بقافي
ردة ٍ واحمد رفيقه يعجبه لا ساق قافه

ادري ان الصمت زين ولانبي كشف الخوافي
والضعيّف لو تعزوى ماش رجال ٍ يخافه

احمد الملفي

مرحبا ترحيبة اللي ما مشى بالدرب حافي
لو وضعت الشوك قدمه ترجع اشواكك خلافه

يابن عوده ما تحرّك قمّة الضلع السوافي
والجبل دربه عسير ومن بغى المرقاب شافه

علي الغدير

البقى بك يالمرحب واعرف الدعوى عوافي
والرجل يترك محل ٍ لو يسره كان عافه

دامها ردت قصايد ف ابشر ابشر بالقوافي
صاحبك يعجبك طرقه لاكتب لك بيت حافه

احمد ملفي

السواليف الثقيله ما هي ابمثل الخفافي
ومن تنازل عن محلّه لا يقول الحظ طافه

والله اني خابر انك قبلها رجلً سنافي
بينك وبين الردى والعيب يالطيّب مسافه

علي الغدير

الصحيح يصح يااحمد والخطا فيه اختلافي
وان بغيت العلم ف اخذه واتركه لاصار تافه

كم شر ٍ فيه خير وكّم خير ٍ شر صااافي
والعلوم مبيّنه قدام لا نقرى الصحافه

احمد ملفي

نسمع بدن الرعود ولا على اللي صار خافي
وانت تدري بالصحيح وبالكلام وباختلافه

عمرة المسلم ليا احرم تبتدي عند الطوافي
و الغشيم اللي سعى من قبل لايبدا طوافه

علي الغدير

نعرف الدين النصيحه غيرها بالدين مافي
ان سمع وان ماسمع بكره يبا يشوف الكلافه

الوفا دربـه طويل ومامشى به غير وافي
استمع واللي وفالك يوم ياحمد عام عافه

احمد ملفي

في ختام السالفه جاك علمي واعترافي
لا تقول احمد تنزّح عنْك و اقفى ب اعترافه

صحت اللالسن

‎مطر ال طرقي

‎الليله الشعار فـي بعض المعاني يهرجون
‎وبن الغدير صاحبي ياخذ من الشعر السنام

‎ان جيت اعد البيت له خاف الغوانم يزعلون
‎يدرا زعلهم لا لعب وليا درا ربعه تمام

‎علي الغدير

‎الليله الشعار في تاريخ عنتر يبحثون
‎ولو كان عنتر حي يارجال ماجاه اهتمام

‎ان كان عندك علم هات العلم جعلك ماتهون
‎واللي يسلم يلزم العالم على رد السلام

‎مطر ال طرقي

‎عدگ على حيل الغنم تنحط لك جوف الصحون
‎وعدك على روس الضباء تقلط على طيب الولام

‎خابرگ شاعر ي على تقدم مع اللي يقدمون
‎لكن هملت المكانه وشغلگ عنها الدوام

‎علي الغدير

‎لا يامطر والراس ويش الراس من دون العيون
‎يالصاحب اللي نحسب اله حساب ماهو بالكلام

‎مادمت خابرني يابو فايز عسى كبار الظنون
‎ماشوهتها سالفة ليلى وتدري صار عام

‎مطر ال طرقي

‎لا والذي خلا جميع الخلق لامره يركعون
‎اني فلا عبرت غيرك بالشعر ي فلان فام

‎الوقت من لامه يبا يلقا الحسايف والطعون
‎واهل الجهل والغي لاتنشد لهم روس العظام

‎علي الغدير

‎الوقت له ضربه يابو فايز ترى بين المتون
‎وشرواك عندي مايهان ولا يهون ولا يضام

‎ياصاحبي لوهم نسو والا بعد لو يذكرون
‎النور ماحد ٍ يجهله ياصاح جلاي الظلام

‎مطر ال طرقي

‎اهل المزاعم ي علي من بعدنا قل وش يزعمون
‎الحق نور ٍ من مشى به ماتبع درب العسام

‎عشر سنوات ٍ عندنا ي ابن الغدير يدرسون
‎واليوم قاموا يدحمون الجنب سلم ي سلام

‎علي الغدير

‎الناس تتبع يامطر ناس ٍ ولا ادري وش تكون
‎عز الله اني شفتهم سررب ٍ مثل سرب الحمام

‎اهل الدروس اليا جهلوا في شي لازم يرجعون
‎واللي تعلم للمقام انقول ليته له مقام

‎صح الله لسسسسانگ مليون ولا يكفن

علي ال غدير

تعال يالطرقي مطر عندي ترى الليله كلام
وابغاك راس براس وانت اسمع وسولف بعدها

ماعاد فيها مرحبا والا بعد فيهاا سلام
لا سلم الله لحيتي للناس والا حدها

مطر ال طرقي

جيتك و جاك الخير جاك الخير مع مبدات عام
وبشر نطيّب خاطرك في مزحها مع جدها

السالفه ماهي هلا ولا هي على راس السنام
والكلمه اللي تحرجك ي أبن الغدير بدها

علي ال غدير

انا خذيت العلم يوم العلم له قدر ومقام
لكّن هد البال لاجيتك ونفسك هدها

العام وضعك ماعليه خلاف وامورك تمام
واليوم ليلى منك حططت يدها في خدها

مطر ال طرقي

دامك  خذيت العلم تكفى طالبك ف أخذ الزمام
انت الكفو انت الكفو اللي يحل عقدها

ليا متى وأنا ارضي العمان واضد الخصام
ليا متى والناس ما تقنع و تلزم حدها

علي ال غدير

عيب ٍ علي اخذه منك يامطر لا بالحرررام
خله معاك الله يعزك وانت اعررفك قدها

خلك وخل اللفلفه لاصار بالوضع احترام
واللي يمينه مدهااا عيب اليسار تمدها

مطر ال طرقي

انا ادري أنك ما توطي همتك ترفى الحشام
وانا أدري أنك تعرف الشيخان غير عمدها

لوّك تلد العين بس شوين شفت الازدحام
وقدام لا وصيك عيني  لصحيب ألدها

علي ال غدير

انا ادري انك شيخ قوم وراس لو جاك اهتمام
يمكن تعيد السالفه كل الحضور تعدهاا

انا اعرف ان الهرج له ملحه واذا نااح الحمام
ياشيب عينك يامطر واللي تجيلك ودها

مطر ال طرقي

ماهو بنا اللي يتقي لاشاف وضع الرمي زام
اقولها وكحل عيون المبغضه وردها

تبقى صلاح السالفه والناس عجت بالرخام
إ تغيير الشكليه و تبن البناء و تهدها

علي ال غدير

انت تعرفني زين يالطرقي مالحقتك ملام
والهقوه اللي ماتقلّط عند غيررك غدها

جب ناس غير الناس دام الوضع يالطرقي مادام
سلك وجامل يوم دامك يوم ثاني ضدها

مطر ال طرقي

إلك الشكر و لك الولاء منا بعد ولك الولام
لو النفوس احيان تزعلها  و تبحث سدها

ما لحقنا  شكه على وضح النقا امن و سلام
ولا شفت سلفان العرب ادع يتبارك كدها

علي ال غدير

لا يامطر مدري علامك تحرف الموضوع شام
كنك تغمض عين عنه وعنه عين تصدها

الشكر لله مانبي لك فضل خل الابتسام
لا تصير ندٍ للعرب لا صار مانت بندها

مطر ال طرقي

شرهت عليك البنت يوم ٍ شافتك و جهت يام
وانت ولد عم ٍ لها ي سترها ي بدها

من لا شكر ي ابن الغدير ما اندعاله بالرحام
روح بفالك والخطيه من جهتنا عدها

وصح  الله   لسانك   م فيك  حيله

علي الغدير

ياسلام الله على اللي جر موال ٍ عراقي 
من فضا والا طرابة بال والا من رواقه 

لكن اسمع يااحمد ابن رشيد لاجيت الطراقي 
لا تعمق خوف تاخذ طبعهم وتجرر ساقه 

احمد بن رشيد

مرحبا بالشاعر اللي لنطرب لشعر فاقي 
ليت قدم للذي جر اللحن يالربع باقه 

اسمعك مانسفهك واقف لها في عظم ساقي 
ومن لحقه الخوف عرض شاربه موس الحلاقه

علي غدير 

البقا بك والقصيد الهزل لا يامن طراقي 
والله ان الشعـر سمعه كنها كرت وبطاقه

ان سمعت وجيت والا رحت ماضاق النطاقي 
يالعميل اللي نشوفه ناحر للشر ناقه

احمد رشيد 

القصيد الهزل ماضنيت بالاشعار لاقي 
يوم شعري  كالصقر لاهد في وقت انطلاقه

كان  في قولك على ماقيل معنا منت شاقي 
بيننا ودرب لامن طال بتبين الليااقه

علي غدير

هد روعك لا تجيب اقصـاك ياارجال بااقي 
للعلوم وللفعول اوقااات ماتبغى رفاقه

سم ضيق البال سنـه غير كيف البيت ضاقي ؟
خل عنك الضلع والبارح ويامشكاي واقه

احمد رشيد

كل بابن جاي منه ريح اسكره بسراقي 
عن هبوب القيض يذري كل بيتن في رواقه

مايضيق البال غير من العلوم انجت دقاقي 
يوم جل الهرج راجح عن علوم انجت  دقاقه

علي غدير

وش علامك صرت شاعمها على ياطاق طاقي 
لو سمعت العلم كنك مانت فاهمني طفاقه

الصحيح اللي يعرفـك مايعرفك غير / راقي 
من طناخه راس زايد ساس معروفن وثاقه

احمد رشيد

كان قولك فالمزون اللي تخايلها حقاقي 
ما نقول انك تخايل مزن ماقالو حقاقه

وانت مانجهل وصوفك  كل ماشتد الوثاقي 
جاك علم واضحن لناس يالطيب وثاقه


وصح لسانك

محاوره بين الشاعر ( عمر بن صبح ~ علي بن غدير )

عمر صبح : 

ابن عوده ماعلى مثله يمر النقد مره
 في قصيده لخص المعنا الحقيقي للجزاله
ياسلام الله عليه ولا وقف لله دره
يبهج الجمهور والشعار من خيرة حلاله

علي الغدير  : 

مرحبا بالشاعر اللي عانق نجوم المجره 
  للادب والشعر كنه صاير ٍ عمه وخاله
انت شاعر ياعمر متواضع ٍ مره ومره 
 فيك نوع من التغطرس من سطر والا جهاله 

        عمر صبح : 

البقا بك يالهزيمي والعمر كره وفره
  نوب ٍ نذوق العسير ونوب لا بالله سهاله 

ما انتظرنا من بني ادم ولو مثقال ذره
 والشكر لله والخيره بما يعطي جلاله

علي الغدير  : 

الحياه دروس يارجال والجاهل تغره 
   وخابر ان شعيل لامنه برك للحمل شاله
كان عندك علم جر الصوت بالطاروق جره 
 والشمالي لو تضايق ياعمر يبغى شماله 

          عمر صبح : 

انت خابر كلمة ٍ قد قالها رجل ٍ نبره
  ما هقينا كلمة ٍ دون الهقاوي من خلاله
وانت تدري لو نوينا فيه مانقدر نضره
  حشمة ٍ له واقتدار ومقدره وايضا جماله

علي الغدير  : 

خابر انك ياعمر من منبع الطيب ومقره 
  تكرم اسبال الرجال وتحسب حساب الزماله
كان تبغى العلم يارجال لك خيره - وشره
  من نصيبه ياعمر واللي بغى العالي رقاله

عمر صبح : 

ماعليكم زود روسٍ  تاخذ المدح وتسره
 قبل مايوخذ بروس المال من دون الشكاله

قولتك وهداية الله والعمر حلوه ومره
مالنا عنه مفر ولا لنا حاجه بداله

علي الغدير  : 

الوكاد ان الصحيح يصح في بحره وبره 
  والحقايق ثابته والحر تكفيه الرساله

ودي انك ياعمر صدرك على علمك تزره 
وانت خابر صاحبك فالك على ظنه وفاله

طاروق بين الشاعرين علي الغدير الهزيمي وعبدالله شباب الزحيفاني


مرحبا من باب هات وزاوية ويش انت جايب ..
والبقى لله ، واللي سلّم وررحبّ هـلابه

خل طيب الساس واسمع كلمة ٍ من راس طايب ، 
وش يجيب الجد الاول بالردي لو اعتزاابه

علي الهزيمي

البقى يااللي ترحب وانت حلال الصعايب
بشرو علي ابن طالب مع تباشير الصحابه

لو تبا تنشد هل المعروف بتزيد المصايب 
مير تحت الساس ماتسمع مقانيب الذيابه

عبدالله الزحيفاني

يابن شباب الليالي ولعت تالي شبايب 
وانت اشوفك تلعب الطاروق وتجر االربابه

من يقول ان الخطا ماجاك من رجال صايب ؟
والحقيقه ثابته واسال وانا اعطيك الاجابه

علي الهزيمي

ماحسبنا وان غزينا ماحسبنا للهبايب 
كم فارس مكرب حزامه ولا نحسب حسابه

الخطا وارد ولكن من يبا يحل النشايب 
ياعلي لا يتوه رايك ثم ناظر بالسحابه

عبدالله الزحيفاني 

انت ماخذها طناخه راس والا بك سبايب 
والزمن لا دار مابه وااحد ٍ حشم جنابه

العلوم اللي تجيب العيد وتزيد الطلايب 
مالها الا واحد ٍ لا قام قيل الععيد جاابه

علي الهزيمي 

ماخذيناها غصيبه ماخذيناها نهايب 
مير مجنون البوادي وش به يقلب ثيابه

جات ليلى تجمع من الشمع مير الشمع ذايب 
مير تال الوقت زاد جنانها حول القرابه

عبدالله الزحيفاني 

 ياعميل الخير حل المساله قبل النصايب 
دامك اللي قد غزيت وقد نهبت ولك مهابه

وش يعد اللي تعدى المرجلـه لا صار شايب 
عززتيله يااووولد شباب لا يطري شبابه

علي الهزيمي

ياوسيع الصدر انا وياك من صلة قرايب
كلنا من صلب واحد بيني وبينك تشابه

عزتي للي غدا في ديرتن ماله حبايب
راحة اعظامه هزيله ولبلا دربه غدابه

عبدالله الزحيفاني

طاروق بين ( حامد محمد العميري - علي عوده الهزيمي ) 

علي 
في محل الشاعر اللي يعتبر شيخ العميره 
مرحباا من هاجس ٍ لا جا لزومه مرحبااني
ان زعلت ارثع بديره وان رضيت افرحت ديره 
والرجال اترك يديها وامسك امسك باللساني

حامد
البقى يالشاعر الي في مقدمة العشيره
يارد العد القراح وباللقى مثل الحصاني
ان زعلتو يالغدير احتشدنا بالشطيره
ولايهم البعد والا القرب وظروف الزماني

علي
انت تبغاها كذا والا كذا مافيـه غييره 
والعلوم الثابته ماهي تبي حلف وضماني
خابر إنا لا زعلنا يززعل الشيخ وشويره  
من زعلنا لكن الاوضاع صارت قلبااني

حامد 
ياعلي لاتحسب ان الهينه مثل العسيره
وانت ماتجهل علوم الخلق يا ذالمودماني
ماعلينا من زعل فرعون لو وصى وزيره
الهزيله ماتسوى بالبلد ويا السماني

علي 
مرت اربع من سنينك وانت قايد للمسيره 
كيف ماتسمع كلام ٍ قيل نبغى شخص ثاني
شرهة الرجال للرجال يااحامد كبيره 
والزعل من باب حق وعشرتك ماهي 8

حامد
مانبا نرفع  ببعض الناس ويجيبه خفيره
من وفانا ياعلي ندمح لتقصير العواني
شرهة الطيب على روس النجوم المستنيره
والله ان مابيني وبين العوارف ترجماني

علي 
لا تجيب اقصاك خل اقصاك ياحامد ذخيره 
ولا يبيعون السلاح اللي يبيعون الصياني
حط غير الباب باب وغير السيره بسيره 
والعرب تطرب على الفكسار عقب البهبهاني

حامد
اعلم ان حامد ماهمه صوت خيال المغيره
والشجاع سلاحه الصمله بيومً مهلكاني
مانبدل في جماعة مسجدك يابو هريره
لو ماصلو ياكود الفرض من بعد ارمضاني

علي الغدير

في محل الشاعر اللي يعتبر شيخ العميره
مرحباا من هاجس ٍ لا جا لزومه مرحبااني
ان زعلت ارثع بديره وان رضيت افرحت ديره
والرجال اترك يديها وامسك امسك باللساني

حامد محمد
البقى يالشاعر الي في مقدمة العشيره
يارد العد القراح وباللقى مثل الحصاني
ان زعلتو يالغدير احتشدنا بالشطيره
ولايهم البعد والا القرب وظروف الزماني

علي
انت تبغاها كذا والا كذا مافيـه غييره
والعلوم الثابته ماهي تبي حلف وضماني
خابر إنا لا زعلنا يززعل الشيخ وشويره
من زعلنا لكن الاوضاع صارت قلبااني

حامد
ياعلي لاتحسب ان الهينه مثل العسيره
وانت ماتجهل علوم الخلق يا ذالمودماني
ماعلينا من زعل فرعون لو وصى وزيره
الهزيله ماتسوى بالبلد ويا السماني

علي
مرت اربع من سنينك وانت قايد للمسيره
كيف ماتسمع كلام ٍ قيل نبغى شخص ثاني
شرهة الرجال للرجال يااحامد كبيره
والزعل من باب حق وعشرتك ماهي 8

حامد
مانبا نرفع ببعض الناس ويجيبه خفيره
من وفانا ياعلي ندمح لتقصير العواني
شرهة الطيب على روس النجوم المستنيره
والله ان مابيني وبين العوارف ترجماني

علي
لا تجيب اقصاك خل اقصاك ياحامد ذخيره
ولا يبيعون السلاح اللي يبيعون الصياني
حط غير الباب باب وغير السيره بسيره
والعرب تطرب على الفكسار عقب البهبهاني

حامد
اعلم ان حامد ماهمه صوت خيال المغيره
والشجاع سلاحه الصمله بيومً مهلكاني
مانبدل في جماعة مسجدك يابو هريره
لو ماصلو ياكود الفرض من بعد ارمضاني